Extension wire sa sulod sang kwarto ang gintunaan sang kalayo sa pagkasunog sang mga pagkabutang sa isa ka balay sa Sanicra Subdivision, Brgy. Gabuan, Roxas City, Biyernes sang adlaw.
Ini ang nangin pahayag ni City Fire Marshall F/SINSP Michael Lopez sang ma-interview sang Brigada News FM.
Suno kay Lopez, natukiban sang grade 12 student nga nagatinir sa amo nga balay nga ginapanag-iyahan sang iya tiya nga yara sa guwa sang pungsod nga nagakalayo na ang mga pagkabutang sa sulod sang pihak nga kwarto.
Madasig naman nga napalong ang kalayo sa bulig sang mga pumuluyo sa palibot.
Samtang, ginabanta nga naglab-ot sa P5,000 ang nangin kahalitan sang amo nga sunog.
Panugyan naman sang opisyal, nga ginadumilian ang paggamit sang mga octupos connection ukon extension cord nga posible mangin tunaan sang traumatic nga sunog.//KMD Gicalde
