NIABOT na sa siyam ka libo ang nag-apply alang sa Business Permit Renewal sa City hall sugod unang adlaw sa Enero hantud sa kasamtangan sa gilugwayan nga paglukat og permit.
Sa kumpermasyon ni Licensing Officer 4 Geraldine Zamora sa 12 mil nga target nga maka-renew og lisensya sa negosyo karong tuiga, nakaabot na sa siyam ka libo ang nag-apply samtang mokabat na sa kapin pito ka libo ang na-isyuhan na og Business Permit.
Gidugang ni Zamora nga karong adlawa Enero 24 subli sila nga magpadayon sa ilang trabaho sa renewal human nga nasirado ang investment building kaniadtongBiyernes gumikan sa disinfection nga gihimo isip pagsunod sa health protocol gumikan sa nagapadayon nga pandemya.
Kon si Zamora ang pasultihon mas paspas gayod ang online nga proseso ug malikayan na ang pagdasok sa mga bookeepers ug mga negosyante nga sila mismo ang nagaproseso sa ilang permit.
Panawagan ni Zamora sa wala pa nasayod sa online nga proseso mangutana lang sa mga personahe sa Treasurers Office nga na-assign sa pagtudlo sa mga taxpayers.
Nanawagan usab si Zamora sa mga business establishments nga sundon ang mga health protocol labaw na ang pagbawal usa sa mga kabataan nga mosulod sa mga malls gumikan sa alert status sa syudad. I Ver Diazon
