NAGAREKLAMO ang mga residente sa highway Barangay Lagao ug Ligaya sa mga nagalumba og motorsiklo panahon sa kagabhion.
Sumala kay Rebecca Burgos isturbo sa katulogon ang mga andar sa mga motorsiklo nga open pipe, dugay na daw sila nga naga-antos sa mao nga sitwasyon.
Abtik usab nga naka report sa Lagao Police Station ang mga tanud sa Barangay Ligaya ug duha ka mga sakyanan ang nakuha sa kapulisan, gikarga sa patrol car unya gidala sa estasyon.
Pagka buntag adunay nag claim sa motorsiklo apan gihatud na ang unit sa impounding area gumikan sa mga kasupakan sa balaud trapiko, gi-isyuhan usab og citation ticket ang tag-iya.
Gidayeg usab ni Kapitan Rolando Tapel sa Ligaya ang iyang mga tanud nga abtik nga naka-monitor sa naga karera nga mga motorsiklo, gipaklaro sa kapitan nga ang uban taga Ligaya samtang ang uban dayo sa ilang lugar aron mag lumba sa highway kon mingaw na.
Panawagan ni Tapel sa iyang mga sakop nga likayan ang drag racing aron malikayan usab ang disgrasya o dakop. I Ver Diazon
