Mga government workers, makauli it temprano sa September 27

Makauli it temprano ro mga government personnel sa September 27 bilang pag-obserba sa unang adlaw it 29^th National Family Week.

Base sa Memorandum Circular (MC) 90 ni Executive Secretary Salvador Medialdea nga gin-otorisa ni Pangueong Rodrigo Duterte, tanan nga trabaho sa idaeum it executive branch hay masuspendi it temprano sa nasambit nga adlaw agud mapasugtan ro tanan nga government worker agud makaibahan ro tagsa nanda ka mga pamilya.

Ro MC 90 hay gin-isyu base sa Proclamation 60 nga ginpirmahan ku 1992 nga nagadeklara eon ro ulihing dominggo it Setyembre kada dag-on hay Family Week.

Gina-engganyo man ro tanan nga government workers sa Executive Branch nga suportahan ro Family Week Celebration nga ginpahaum it National Committee on the Filipino Family.

The memorandum circular hay gin-isyu man agud makaibahan it mga government workers ro andang pamilya sa Kainang Pamilya Mahalaga, sa tagsa nanda ka panimaeay.  

Ro ‘Kainang Pamilya Mahalaga Day’ hay ginselebrar kada ika-ap-at nga Lunes it September kada dag-on agud ma-engganyo ro kada pamilyang Pilipino nga ipreserba ro tradisyun nga magkaibahan sa pagkaun ro magpamilya. / ANN DESLENE SALAZAR

BNFM Kalibo