NAKURATAN ang mga lumulopyo sa Purok 2, Lot 70, Barangay Ladol, Alabel Sarangani Province tungod adunay kalit miabot nga grupo sa mga tawo ug gi-koral ang usa ka luna kung asa adunay mga tawo nga nagpuyo.
Sa paghinabi sa Brigada team kang alias Sison nagpatabang kini sa Brigada tungod sa kaguliyang nga nahitabo sa ilang lugar, nagdala matud pa og mga kawayan ang grupo aron koralon ang area, apan ginapugngan usab kini sa mga residente ug ginaguba, rason nga nagpatabang na siya tungod sa posibleng mahitabo nga kasamok labaw na nga adunay daghang mga bata.
Sa bahin ni Cherry Melendez napalit nila ang 600 square meter nga luna niadtong milabay nga tuig gikan sa pamilyang Valmera ug aduna silay mga dokumento niini, miadto sila sa lugar aron koralon ang luna isip pamatood nga napalit na niya kini.
Dugay na matud pa siyang nagapamalit og yuta, apan nakuratan siya sa unang higayon nga adunay daghang tawo nga mibabag sa ilang pag koral. Samtang gibutyag ni Kapitan Abdon Blanco komplikado ang maong yuta tungod namatay na ang tag-iya niini ug ang mga pamilya nga nabilin maoy nag claim, dili matud pa tumong sa land-owner nga pamilyang Valmera nga pahawaon ang mga lumulopyo dinhi, apan bayaran nalang ang area nga napatindogan sa ilang balay aron mahapsay ang ilang pagpuyo.
Sa hisgotanan nga nagpadala og mga Tanod ang Barangay gikompirma kini sa Kapitan human nga aduna silay nadawat nga sulat nga naghangyo og Tanod ang tag-iya nga Valmera aron magbantay sa lugar samtang magkoral ang pamilyang Melendez nga nakapalit sa 600 square meter nga luna daplin sa baybayon.
Tungod niini, naundang ang pagkoral ug gitambagan sa mga mirespondeng pulis ang pamilyang Melendez nga nakapalit sa luna nga magkuha usa og court order aron mahimong klaro ang impormasyon ug dili magkagubot ang mga tawo nga nagpuyo dinhi. I Enamie Mogpon
