CEBU CITY –Gihingusgan karun sa Cebu City Police Office ang pagdakop sa mga wanted persons ingon man pagkompiskar sa mga dili lisensiyadong armas aron dili magamit sa dautan ilabi na nga nanghinangat ang Barangay ug Sangguniang Kabataan Elections sa Oktubre.
Gipadayag ni Police Colonel Ireneo Dalogdog, City Director sa Cebu City Police Office nga gilikayan nila nga ang mga wanted persons magamit isip Private Armed Groups sa mga kandidato.
Base sa rekord sa CCPO sa buwan sa Enero hangtod sa kasamtangan nakapahigayon sila og 1,080 ka manhunt operations nga miresulta sa pagkasikop sa 498 wanted personalities.
Diin sa 498 nga nadakpan, 171 niini most wanted persons, 124 provincial level, 142 municipal level ug 327 other wanted persons.
Samtang sa loose firearms sa samang panahon, 202 ka operasyon ang napahigayon sa CCPO nga miresulta sa pagkasikop sa 158 ka indibidwal ug 163 ka mga nagkalain-laing kalibre sa armas ang nakompiskar ug sa 92,997 ka Oplan Katok operation 54 ka surrendered firearms ang natala sa CCPO.//
