LEGAZPI CITY – Ibinareta kan Bureau of Fire Protection (BFP) Legazpi na wara nin nairehistrong anuman na kaso nin kasulo sa syudad na may kinaraman sa paputok kan nakalihis na pagselebrar nin Kapaskuhan.
Sa intrevista kan Brigada News FM Legazpi kay Senior Fire Officer 3 Madonna Orendain – Rempillo, sinabi kaini na labi man an saindang preparasyon ngareg masiyerto an matoninong na pagselebrar kan Kapaskuhan orog na sa pagsabat kan Bagong Taon kun sain dakol naman an mga nagtitirinda ki mga paputok.
Nagpapadagos an saindang bandilyo, siring man an saindang fire truck visibility sa gabos na mga barangay sa syudad.
Mahigot man su boot an pag-monitor asin pag-inspeksyon ninda sa mga nagtitirinda ki mga paputok sa may Sawangan Park nganing siyertuhong ligtas an mga pigpapabarakal ninda asin nganing hilingon kun nagsusunod sinda sa pinapautob kan mga otoridad dapit sa mga pinagbabawal na paputok.
Naglalaom si Rempillo, mamantenir an record sa syudad na wara ki nairehistrong firecracker-related fire incidents puon pa kan nagtalikod na taon.
