LEGAZPI CITY – Lugadan an sarong lalaki makalihis ining mabangga nin pick-up mantang ini nagbabalyo sa tinampong sakop kan Purok 7, Brgy. Tabon-Tabon, Daraga, Albay kasuhapon.
Binisto ang biktima na si Egmar Millendres Vegas, 22 anyos na residente kan nasambitan na barangay.
Segun sa report, sarong Toyota Hilux 4×2 pick-up na minamaneho ni Raymund Irog Sagario, 40 anyos na residente gikan sa Banay, Cabuyao Laguna an paduman sa sentro kan Daraga hale sa Sorsogon City kan aksidente kaining mabangga an biktima mantang nagbabalyo sa nasambit na tinampo.
Huli kaini, nagsapar nin mga lugad sa manlain-laing parte kan lawas an biktima kaya tulos ining dinalagad sa BRHMC para sa medikal na atensyon.
Mientras an imbweltong driver pati an saiyang lunadan, nasa kustodiya kan Daraga MPS para sa magkakanigong disposisyon.
