Dakop sa akto ang isa ka lalaki nga nagapas-an sang motor engine sang hand-tractor nga ginapanag-iyahan sang pulis sa Brgy. Agbalo, Panay, Capiz.
Ginkilala ang nadakpan kay Arnel Arguilles alyas “Orig”, 42-anyos kag residente sang Sitio Uyapad, Brgy. Binuntucan sa banwa sang Pontevedra.
Sandig sa impormasyon nagikan sa Panay Municipal Police Station, pasado alas 2:00 sang kaaganhon, Dominggo, Setyembre 17, nakabaton sila sang tawag gikan kay PSSG Fredonan Batilaran, isa man ka katapo sang pulis sa nasambit nga banwa, agud i-report nga may yara ini sang nadakpan nga lalaki nga iya naaktuhan nga nagapangawat sang motor engine matapos ginkakas sa iya ginapanag-iyahan nga hand-tractor ukon Bao-Bao.
Ginapahayag nga kaupod sang suspek ang bayaw sini nga ginkilala kay certain Allan Barredo alyas “Boy” apang madasig nga nakapalagyo.
Narekober sa paghinakop ni Arguilles ang isa ka unit sang motor engine nga nagabalor sang P20,000, motorsiklo kag isa ka backpack nga naga-unod sang 10 ka pulgada nga kutsilyo, tsenelas, kag t-shirt.
Sa karon, yara na sa kustodiya sang Panay PNP ang suspetsado kag natalana nga pasakaan sang nagakaigo nga panumbungon. | Judy ann Juare
