Alerto ang kapolisan sa Cagayan de Oro City Police Office ug Misamis Oriental Police Provincial Office batok sa presensya sa New People’s Army ning panahon sa eleksyon.
Gibutyag ni COCPO City Police Director Colonel Aaron Mandia nga hugot ang ilang koordinasyon sa 4th Infantry Division Philippine Army ilabi na niadtong nakalabay nga semana, dunay engkwentro nga nahitabo sa hinterland area sa brgy. Tinapoloan ning syudad.
Gani, homan nga naka-abot sa kapolisan ang maong impormasyon diha-diha nga gipa-aktibo ang checkpoint sa brgy. Mambuaya sa pamasin nga dunay maka-agi nga samarong rebelde.
Samtang, gibutyag sab ni Misamis Oriental Police Provincial Director Colonel Raniel Valones nga nakatutok sila sa mga gikonsidera nga “threat groups”, ug gawas niini padayon sab nila nga gihatagan sa pagtagad ang pagpatuman sa mga serbisyo sa gobyerno kaabag ang militar ug ubang ahensya sa gobyerno ngadto sa mga hilit nga lugar.
Kini ubos sa direktiba ni Presidente Rodrigo Duterte alayon sa Executive Order No. 70 aron mapadali ang pagtubag sa ugat hinungdan sa insurhensya.
Sa pagkakaron, nagpabilin nga hapsay ug malinawon ang Cagayan de Oro ug Misamis Oriental ug walay natala nga insidente nga direktang matumbok nga dunay kalabutan sa eleksyon. -END- (Claudine)
