Nakumpiska sa mga sakop sa Davao City Police Office (DCPO) ang kapin tunga sa milyon kantidad sa gituohang shabu sulod sa 24 oras nga kampanya batok iligal nga droga, gikan Mayo 7 hangtod Mayo 8 ning kasamtangang tuig.
Nunot kini sa padayong paningkamot sa kapulisan, ilawum sa pagdumala ni DCPO, City Director, Pcol Richard Bad-ang, diin malampusong nasikop ang pulo (10) ka drug suspek atol sa siyam (9) ka managlahing anti-illegal drug operations.
Atol sa operasyon, nakuha sa mga dinakpan ang kinatibuk-ang kantidad sa gidudahang shabu nga mubalor sa Php563,903.60.
Tingkagol na karon sa prisohan ang maong mga suspek ug gihikay na ang pagpasaka og tukmang kaso kalabotan sa iligal nga droga batok kanila.
Samtang, gipasalig sa DCPO nga dili sila mohunong sa pagsumpo sa iligal nga droga sa dakbayan sa Davao pinaagi sa tabang sa komunidad ug sa pakigtambayayong sa lokal nga panggamhanan ingun man Brgy officials.
