Personal nga nag agto si Kalibo Mayor Juris Sucro sa Western Visayas Medical Center sa Iloilo para bisitahun ag makita ro kahimtangan it biktimang nabun-an sa ueo sa natabo nga rambol sa Brgy. Tambak, New Washington ku nagtaliwan nga adlaw.
Nagtao man si Mayor Sucro it P50,000 bilang bulig sa pagpa-opera it biktimang si Sherwin Dela Cruz 38yo, nga taga Brgy. Tambak sa nasambit nga banwa.
Owa’t eabot sa P50,000 nga cash hay nagpromisa man ro alkalde nga magapadaea raya it guarantee letter halin kay Senator Hontiveros nga sanda hay mabuligan sa andang gaeastuson sa ospital.
Samtang, eubos man ro pasaeamat it pamilya ni Sherwin Dela Cruz sa mabahoe nga bulig nga gintao it alkalde kanda.
Matandaan nga Sabado it tungang gabii kat nakaangkon it rambol sa Brgy. Tambak kung siin nabun-an ro biktima sa ueo kara.
Ginkilaea ro suspek nga si Joseph Masinda Jr., alyas Muroy it Brgy. Mabilo, New Washington ag napasakaan eon it kasong frustrated homicide. / ANN DESLENE SALAZAR
