-Reymund Titong
(1st Update) KABANKALAN CITY, Negros Occidenta — Gina-sigahom sang grupo sang mga negosyante nga ang syudad sang Kabankalan ang mangin ‘business center’ ukon sentro sang negosyo sa sur nga bahin sang Negros Island.
Sa interview sang Brigada News FM-Kabankalan kay Frank Carbon, presidente sang Metro Bacolod Chamber of Commerce and Industry (MBCCI), iya gin-siling dapat mangin progresibo kag madinuagon ang syudad sang Kabankalan paagi sa pagtukod sang airport, pabaskugon ang telecommunication, kag pangitaan kun diin pwede mapahamtang ang malapit nga seaport.
Basic infrastructures, road networks kag inter-provincial roads ang iban pa nga ginalantaw sang negosyante nga importante agud nga mangin mahapos ang pagdala sang serbisyo kag oportunidad sa isla sang Negros.
Para kay Carbon, ang lokasyon sang syudad ang ‘strategic,’ bangud malapit ini sa Dumaguete City sa Negros Oriental (2-3 hours), kag Bacolod naman sa Negros Occidental (1.5-2 hours).
Dugang pa ni Carbon, kun indi gid man igapahamtang ang mga regional offices ang syudad, may posibilidad sa giyapon nga ma-estabishar diri ang mga satellite offices sa mga ahensya sang gobyerno.*
