Ginpamalibaran makarun ro sangka post sa social media account it sangka netizen sa banwa it Estancia, Iloilo kaangot sa pagkidnap sa anang gumankon.
Haeos 700 Facebook users ro nag share it post bago raya gin-delete it tag-ana.
Sa anang post, ginpaandaman nana ro publiko kaangot sa grupo it mga indibidwal nga ro modus hay kidnapon ro mga unga, eabi eon ro mga unga nga baye sa mga karsada ag pwersahan nga ginasueod sa van.
Kinumpirma nana nga bukon it matuod ro impormasyon nga ginasugid nga kan-o eamang, ro anang gumankon hay sangkiri eang boe-on it sangka kidnapper nga nakasakay sa sangka tricycle.
Sa imbestigasyon it Iloilo Police Provincial Office, bukon it matuod ro nasambit nga report matapos akuon it ginasugid nga biktima nga gin ubra nana ro istorya agud irasun ro anang pag-absent sa anang trabaho.
Na-interview it mga imbestigador it IPPO si “Neneng”, 20 anyos, sangka house helper, nga nagsugid sa Estancia Municipal Police Station sa sangka eaeaki nga nagkidnap segun kana bandang 6:30 it gabii it Agosto 28, 2022.
Raya segun hay sapilitang ginsakay sa sangka tricycle samtang ginatakpan ro anang baba it tela ag pagtutok it mataeum nga bagay sa anang kilid.
Ginhambae pa nana nga nalipong imaw, pero ku ulihe hay nakatakas imaw halin sa kidnapper.
Sa sangka serye it interview it mga imbestigador kay “Neneng”, inako nana nga ro anang istorya hay ginhimo eang kara nga alibi sa anang mga amo sa owa pagsabat sa andang mga tawag.
Nasayuran nga si “Neneng” hay nagpanaw sa baeay it anang amo sa Estancia, Iloilo nga owa it abiso.
Samtang, umapela ro Iloilo Police Provincial Office sa publiko nga maging mahaeong sa pag-post sa social media it anumang impormasyon angot sa kriminalidad.
Ginpahayag ni Police Colonel Adrian Acollador, Acting Provincial Director, IPPO, nga ro bukon it validated nga impormasyon angot sa kriminalidad hay mahimo maka-krear it pagka alarma ag hadlok. / ANN DESLENE SALAZAR
