ALARMING matud pa ang ihap sa mga kabataan o menor de edad nga nagatrabaho na.
Kini segun kang Chris Peniales, opisyal sa Family Planning Organization of the Philippines kung basehan ang datos sa Philippine Statistics Authority nga mokabat sa 50,000 kun 4 percent sa 1.4 million nga gatrabaho ang makonsidera nga menor de edad pa.
Dugang ni Peniales nga dili lang pisikal, mental apan lakip na ang pagtungha sa mga nahisgutan ang apektado sama sa kaso sa South Cotabato nga daghan ang kaumahan ug mga bata ang mapugos sa pag-undang tungod kinahanglang motabang sa pagtrabaho.
Karon nga may pandemya, gibutyag ni Peniales nga daghang pamilya ang nawad-an og trabaho ug ang mga bata ang nagapaningkamot nga makatabang bisan dili pa kaya sa ilang lawas.
Tungod sa bata pa nga nagatrabaho, maapektohan usab ang ilang pagtubo ug mabutang sa peligro ang kinabuhi labi na kung hazardous o delikado nga matang sa trabaho.
Luyo nga maayo man ang pagtrabaho sa sayong pangidaron apan kini angayang didto lang sulod sa balay sama sa mga household chores, o pabantayon sa tindahan aron sa ilang pagdako makakat-on usab sa pagnegosyo apan dili kinahanglang muundang sa pag-eskwela. Nasayran nga may balaod na sa nasud nga nagabawal sa child labor apan tungod sa kapobrehon, kawad-on sa edukasyon daghan ang nagtrabaho nga bata pa.
