Ginpaandaman ni Police Colonel Joeresty P. Coronica, head it Iloilo City Police Office (ICPO), ro publiko kontra sa illegal nga mga paeupok agud masiguro ro safety sa selebrasyon it Bag ong Dag on.
Raya ro ginhayag ni Colonel Coronica kasunod it ginpaguwa nga listahan it PNP Firearms and Explosives Office (FEO) it mga ginabawae nga firecrackers o paeupok.
Ro nasambit nga listahan hay may tinutuyo nga ma-regulate ag ma-monitor ro pag-manufacture, pagbaligya ag paggamit para mabawasan ro firecracker-related injuries.
Ro mga banned o bawae nga firecrackers hay ginaeakipan it Watusi, Poppop, Five-Star, Pla-Pla, Piccolo, Giant Bawang, Goodbye Bading, Goodbye Philippines, Atomic Bomb, Super Lolo, Lolo Thunder, Kwiton, Hello Columbia, Juda’s Belt, Giant Whistle Bomb, Atomic Triangle, Goodbye Delima, Mother Rocket, Goodbye Napoles, Coke-In-Can, Super Yolanda, Pillbox, Bin Laden, Kabasi, ag Boga.
Base sa ICPO, kung maglampas sa maximum nga 0.3 grams or 1/3 teaspoon ro gunpowder sa sangka paeupok, ginakonsidera eon raya nga illegal. // ANN DESLENE SALAZAR
