Gihaya na karon sa iyang mga kabanay ang usa ka mag-uuma nga namatay human napaakan sa matud pa og banakon o King Cobra didto sa Barangay Olaycon, Monkayo Davao de Oro.
Sa impormasyon gikan sa Monkayo Municipal Disaster Risk Reduction and Management Office, giila ang biktima nga si Rodrigo Ugay Dijos hamtong ang edad.
Sumala pa nga lango sa ilimnong makahubog ang biktima nga nagsakay og motorsiklo aron mupauli sa iyang balay.Mikanaog matud pa kini aron motabang sa dihang nasugatan sa dalan ang grupo sa mga kalalakin-an nga nagtinabangay sa pagpatay sa cobra.
Gihawiran sa biktima ang cobra diin napaakan ang iyang nawong ug likod hinungdan nga gidala siya sa manambalan apan wala na natabang pa ug nakabsan sa iyang kinabuhi. BNFM-DAVAO
