GAAMPO na lamang karon si Dr. Fidel Peñamante, Presidente sa Philippine Medical Association o PMA-GenSan nga may maayong resulta ang panag-istoryahay tali sa PhilHealth ug local official sa syudad kalabot ang claims nga wala pa nabayran ngadto sa mga ospital.
Segun ni Peñamante nga angayang mahatagan og kasulbaran ang maong problema tungod lagmit mahugno ang tibuok health system kung wala nay ikasarang sa pagpadagan ang mga ospital.
Kung wala matud pay maayong resulta sa panag-istoryahay, gikabalak-an ni Dr. Peñamante nga mobalik sa kaniadtong estado sa health system asa ang mismong pasyente ang mobayad sa iyang pagpa-ospital.
Una nang gisuspendi sa PhilHealth ang claims sa mga ospital labi na sa COVID-19 claims tungod sa mga pipila ka kwestyon.
Apan gituohan usab ni Peñamante nga dili usab tanang claims ang kwestyonable.
Nasayran nga nagpagawas og sulat ang mga COVID-19 referral hospital sa syudad kalabot sa ilang claims sa PhilHealth nga mokabat sa sobra P800 million nga wala pa nabayran ug nabalaka nga maapektohan ang ilang operasyon tungod wala na silay magamit sa pagpadagan sa tambalanan.
