MAGPATABANG ang health authorities sa mga opisyal sa Purok aron makab-ot ang taas nga vaccination coverage batok Covid-19.
Matud ni Dr. Rochelle Oco, labaw sa City Health Office dunay 609 ka Purok ang 26 ka barangay sa GenSan. Matag Purok dunay target bakunahan nga 55 katao kung kini ang makuha dakong tabang aron makab-ot ang target population.
Gawas niini, nakig-alayon usab sila sa mga fastfood chain, clinic ug pribadong mga doktor alang sa tulo kaadlaw nga national vaccination campaign nga magsugod sa Nobyembre 29 hangtud Desyembre 01. Sa tulo kaadlaw nga Bayanihan, Bakunahan kinahanglan makabakuna ang GenSan og naa sa 35,089 katao matag adlaw.
Sa tulo kaadlaw kinahanglan makab-ot sa dakbayan ang 105,267 katao nga mabakunahan batok sa virus. Dugang ni Oco, angayang magpabakuna na ang wala pa nabakunahan aron usab makab-ot sa GenSan ang herd immunity.
Tungod karon naa pa lang sa 36.44% o 167,549 katao pa lang sa siyudad ang fully vaccinated samtang43.47% o 210,049 ang partially vaccinated. Kini gikan sa 459,732 target population aron makab-ot sa dakbayan ang herd immunity bag-o mahuman ang kasamtangang tuig. ( Richel Gubalani)
