Opisyal nang gipagawas sa Commission on Elections Northern Mindanao ang pipila ka gabayan alang mismo sa adlaw sa piliay karong Mayo 9, ning tuig 2022.
Gibutyag ni Comelec-10 Regional Election Director Atty. Francisco Pobe nga kalakip niini ang kabag-uhan sa oras sa pagbotar, diin magsugod na sa alas 6 sa buntag hangtod sa alas 6 sa gabii.
Samtang gitugot pa nga makabotar ang mga indibidwal nga mo-abot og 30 minutos gikan sa alas 6 sa gabii, basta nakasulod lamang sa 30 meters radius sa polling center.
Kahibaloan nga gikan sa 1,000 nga cluster precincnt capacity, gi-ubsan kini sa 800 capacity hinungdan nga gidugangan og 10,000 ang 98,000 ka vote counting machines.
Subay niini, wala nay dad-on nga vaccination card ug voter’s ID apan hugot nga ipatuman ang minimum health protocol, sama sa facemask ug pagsunod sa social distancing.
Una nang mi-angkon si Atty. Pobe nga ning umaabot nga piliay, mas daghan ang trabaho tandi sa nakalabay nga eleksyon, diin sa karon dunay nay ipahimutang nga emergency polling place kung asa didto makabotar ang mga makitaan sa sintomas.
