Dili matud pa makatarungan ang gihimong desisyon sa pamunuan sa Foodpanda sa pagsuspendi sa kapin 300 ka mga partner riders niini sulod sa 10 ka tuig nga tataw paglapas sa ilang katungod.
Kini ang gibarugan ni Chairperson on labor and employment opportunities City Councilor Pamela Librado-Morata atol sa iyang privelege speech sa milabayng sesyon sa konseho, kung asa gihingusgan niini nga klarong wala gikonsidera sa management ang kaayuhan sa ilang mga riders human nibalibad sa negosasyon.
Gitawag nga “unjust, unreasonable ug wala misubay sa hustong proseso ang 10-year suspension resulta sa singgit sa mga riders nga ipakita ang transparency sa payment scheme computation sa ilang mga kita, ug ang gipangayo nga benipisyo, lakip ang health ug accidental insurance.
Gawas niini gibutyag usab sa konsehal nga gisugdan gilayon sa Foodpanda Management ang gitawag niining whistleblower program, kung diin gihatagan og balik og access ang mga nasuspending riders kung duna silay mahatag nga impormasyon bahin sa gilusad nga protesta sa milabayng semana.
Nasayrang giangkon sa konsehal nga nakadawat kini og suwat gikan sa Davao United Delivery Riders Association Inc., nga nagpakitabang human gisuspendi ang gatusan ka Foodpanda riders.
Kagahapon lang usab, gikwestyon sa konsehal ang gpalugwang pahayag sa food panda nga nagkanayong taas ang rate sa mga riders niini dunay benipisyo, diskwento sa gasolina, mobile data, insurance ug uban pa.
Sa kabahin usab sa mga riders, gipanghimakakan nila nga dunay susamang mga benipisyo ug pribelihiyo nga ilang natagamtaman dinhi sa Davao City, inay ilang kaugalingong gasto.
