Half day nalang ang face to face classes sa Preschool tubtob Senior High School (Public and Private) sa Roxas City base sa panibag-o nga executive order nga ginpapanaog ni City Mayor Ronnie Dadivas.
Sandig sa Executive Order No. 13, sa aga na lang patigayunon ang face to face classes apang yara na sa direksyon sang school heads/administrator ang pagdeterminar kun ano oras ang klase kada adlaw kag sa hapon ipatigayon naman ang modular ukon online learning.
Samtang, awtomatiko naman nga suspendido ang klase kun maglab-ot sa 52 degree Celsius ang heat index suno sa forecast sang PAGASA.
Ang klase naman sa tanan nga mga kolehiyo, unibersidad lakip ang graduate school ang nakadepende sa diskresyon sang ila school administrator base man sa CHED Memorandum Order No.15 series of 2012.
Ang nasambit nga tikang ang produkto sang consultative dialogue sa tunga sang City Government, pamunuan sang mga Public kag Private Schools, PTA kag Student Council nga ang katuyuan agud maghatagan sang proteksyon sa ikaayong-lawas kag pagtulun-an sang mga kabataan. | Ken Mark Gicalde