MAG-ATUBANG og kasong criminal ang duty jail officer sa Tambler Police Station dungan sa pagpangulata- patay sa inmate.
Kini ang gikumpirma ni PCol.Gilberto Tuzon, director sa General Santos City Police Office (GSCPO). Matud ni Tuzon, gihulat na lang niya nga mosaka sa iyang buhatan ang case folder gikan sa investigation section sa GSCPO aron pormal nang maduso ang kaso. Lantawon usab nila base sa resulta sa imbestigasyon kung mataktak sa pwesto ang hepe sa presinto nga si Major Ananias Vasquez tungod sa ‘command responsibility’.
Kahibaloan nga May 5 sa gabii dihang gidakop ang namatay nga si Philip Nocete, 45-anyos, ulitawo, sekyu human gireklamo sa naka-table nga babaye sa video-k bar sa Barangay Calumpang.
Girespondehan sa kapolisan ang sumbong, gibitbit sa presinto si Nocete human matud pa kini nagmaoy ug naa sa ilawom sa ilimnong makahubog. Pipila ka oras ang milabay, gikulata kini sulod sa pansayan sulod sa selda sa presinto, gidala sa ospital apan napatay. Miduol ang pamilya sa NBI-SARDO alang sa hangyo nga i-autopsy ang kamatay human sa duda nga dunay kalabutan ang kapulisan sa pagkamatay sa ilang kabanay. (Richel Gubalani)
