MOKABAT na sa 56 ka unit sa mga electric jeeps ang nagadagan sa mga rota sa Ladotransco gikan sa Barangay Calumpang samtang aduna pay moabutay nga 15 ka mga e-jeep units ug 20 ka bus karong bulana.
Sa kumpermasyon sa chairman sa Ladotransco nga si Robert Cang karong bulana adunay madugang nga mga electric jeeps ug mobyahe sa ilang rota nga gi-aprubahan sa Land Transportation Frachising and Regulatory Board.
Gidugang ni Cang nga ang Route 12 sa Barangay San Jose ang plano nila nga pasudlan og e-jeep kay sementado na ang dalan apan kulang pa sila og garahe, kinse ka unit unya ang ilang padaganon sa San Jose.
Hinuon ilaha pa nga i-han-ay ang ilang pagpamasada sa San Jose padulong sa Barangay Calumpang pinaagi sa pagpakig-istorya sa taga Barangay kay adunay ma-apektohan nga mga habal-habal drivers sa lugar.
Giklaro ni Cang nga sa ilang bahin gusto sa gobyerno nga mga serbisyuhan ang sumasakay sa mao nga dapit unya makasinati sa mas ubos nga pletihan subay sa taripa.
Samtang gina-awhag ni Cang ang katawhan sa GenSan nga magsugod na sa paggamit sa topcard sa pagsakay sa e-jeep aron mas sigurado sa gibayad sa pagsakay kay nakabasi kini sa actual distance, sa karon anaa na sa 6,000 ka tawo sa GenSan ang nagagamit sa topcard ug nanghinaut sila nga madungagan pa ang outlet niini.
Sa karon ang nagagamit sa topcard ang mga pasahero sa e-jeep sa Barangay Calumpang ug Doña Soledad. ( Ever Diazon)
