BICOL – PIGREKONUSIR kan DSWD-Bicol an mga community groups na saindang nakatuwang sa implementasyon kan Kapit-Bisig Laban sa Kahirapan–Comprehensive and Integrated Delivery of Social Services o KALAHI-CIDSS program kasabay kan isinagibong 7th Regional Bayani Ka! Awards.
Segun ki Ranelle Anne Sertan, DSWD-Bicol social marketing officer, an ‘Bayani Ka!’ awarding na isinagibo via Facebook Livestream, an sarong taunang aktibidad na ginigibo kan ahensya tanganing tawan onra an mga outstanding community volunteers.
Mismong an mga personahe kan DSWD na pig-deploy sa man iba ibang
munisipalidad an nangenot sa nomination, kun saen nagkapira sa mga naging basehan eu an aktibong pakikisumaro asin kontribusyon kan mga volunteer group sa implementasyon kan programa.
Nababanga man an award sa walong kategorya kabala an gender and development, elderly, youth, sustained community volunteer group, indigenous people’s welfare, persons with disability (PWD), improved local governance, asin environmental protection.
Mantang isinagibo man an judging virtually sa pangengenot kan technical working group na kompwesto kan partner-agency representatives, LGUs asin mga piling DSWD workers.
Kabale sa mga nakaresibe nin onra an Karibangbang – Pandan, Catanduanes para sa Gender and Development Category; Pandan Senior Citizens Organization; Kalipunan at Samahan ng may Kapansanan Inc. (KASAMA KA Inc.) sa Barcelona, Sorsogon at Pandan Badminton Association sa youth category.
Siring man an San Andres Catanduanes Farmers and Fisherfolk Association; LGU Pandan – Mayor’s Office; Agta-Tabangnon sa Presentacion, Camarines Sur; mantang an banwaan man nin Pandan an nakaresibe nin parangal sa irarom nin Environment Protection category.
Mientrastanto, apwera sa plaque of recognition, nakaresibe din an kada regional awardee nin development incentive na nagkakantidad nin bente mil de pesos.
