Patay ang usa ka driver nga nagmaneho ug Multicab human kini mibangga sa likod nga bahin sa Pay Loader Truck niadtong nakalabayng alas 7:10 sa gabii, Enero 16, 2024 sa P-2 Brgy. Sumilihon ning syudad sa Butuan City.
Giila sa Ampayon Police Station ang operator sa Pay Loader Truck nga si Johnny Trinquite Felias, 54-anyos, minyo ug residente sa P-8, Brgy. Kinabjangan, Nasipit, Agusan del Norte. Samtang ang biktimang driver sa Multicab nga napatay mao si Arnulfo B. Delicano, 59-anyos, minyo, driver ug residente sa P-5 Brgy. Marcos, Magallanes, Agusan del Norte uban sa 5 ka mga pasahero nga mao sila Jeco L. Casabuena, 28-anyos, lalaki, Nathaniel U. Malinao, 40-anyos, lalaki, minyo, Esther G. Lorenzo, 35-anyos, babaye, minyo, Redemia L. Delos Angeles, 63-anyos, babaye, biyuda, book keeper pulos mga residente sa Munisipyo sa Magallanes ug Lorna M. Jayuma, 43-anyos, babaye ug residente sa P-4, Brgy. Sumilihon, Butuan City.
Base sa pagpanubay sa mga kapulisan ang nahisgutang Pay Loader Truck mihunong subay sa fast lane nga nag-atubang sa amihanang direksyon sa P-2, Brgy. Sumilihon, Butuan City ug anaa sa saktong precaution (Left Signal) nga naghulat sa libre nga dalan para makamaniobra sa left turn apan aksidenteng nibangga sa likod nga bahin ang multicab nga nagbiyahe sa samang direksyon padulong sa lungsod sa Magallanes.
Tungod sa kusog nga impact sa pagkabangga niini, nakaangkon matud pa kini ug dili tiaw nga mga bun-og ug pangos sa kalawasan ug daling gidala sa mga personahe sa Bureau of Fire Protection Ambulance sa Butuan Medical Center alang sa hinanaling medical nga atensyon apan gideklarar kini nga dead on arrival sa attending physician. Samtang ang mga sakay niini nga mga pasahero ang naka-angkon ug mga minor injuries nga gidala usab sa susamang balay tambalanan alang sa medikasyon.
Sa pagkakaron ang operator sa Pay Loader Truck ang gidala sa Butuan City Police Station 4 alang sa saktong disposasyon. Kasamtangan na usab ipahiluna sa iyang kabana yang patawyng lawas sa biktima.
-END-
