WALA pa’y na-detect nga kaso sa mas infectious nga Omicron variant sa Soccsksargen apan giangkon nga dunay posibilidad sa pagsulod niini sa rehiyon.
Kini ang rason sa pagmandu sa Department of Health (DOH) 12 sa mga local epidemiology unit sa mga LGU’s sa gilayong pagkolekta og samples alang sa posibleng genome sequencing partikular na sa bag-ong abot gikan sa abroad.
Lakip sa mga indibidwal nga dunay history sa exposure sa variant sa National Capital Region (NCR). Matud ni Dr. Arestides Concepcion Tan, regional director sa DOH-12 sa karon orihinal nga variant sa Covid-19 ang rason sa subling pagsipa sa kaso sa virus.
Hinungdan sa panawagan niya sa publiko nga magpabakuna na ug hugot sundon ang health protocols sama sa pagsuot og facemask, paglikay sa lugar nga daghang tawo ug kanunay nga paghugas og kamot. Sa GenSan, gikan sa tulo ka bag-ong kaso atong Enero 5 hinay hinay na ang pagsaka sa kaso sa Covid-19.
Una nang, gialoman ni Dr. Ryan Aplicador, Chief of Hospital sa Dr. Jorge P. Royeca Hospital ang pagsipa sa kaso human sa holiday season. Luyo niini, pabilin sumala pa sa karon nga naa sa alert level 2 ang rehiyon. I Richel Gubalani
