Gawas sa babayeng biktima nga nawad-an og dakong kantidad sa kwarta atol sa duguong disgrasya sa Magtuod, Maa, Davao City sa miaging sabado, doble kasakit usab karon ang gibati sa delivery rider human gikawatan usab sa iyang koleksyon atol sa hitabo.
Kini human duna matud pay P15,000 nga koleksyon ang nakabsang rider nga si Armando Bonleon nga takda unta niining i-remit sa wala pa nabangaan og truck.
Matud sa asawa sa biktima nga si Rosalie Bonleon nga human napahibalo sa manager sa delivery company gisuta dayon niini ang pitaka apan wala nay kwarta ang pitaka.
Nawala na usab ang ID sa Ninja Van sa iyang bana, apan ang SSS, Driver’s license ug ubang ID anaa sa sulod sa pitaka.
Plano sa asawa niini nga ireport ngadto sa kapulisan ang pagkahanaw sa kwartang koleksyon aron mas mapalawman pa ang pagsubay ug imbistigasyon. BNFM-DAVAO
