Ginpahayag sang delivery boy sa kapulisan nga siya ang ginhold-up kag gintayaan kutsilyo sa liog sang duwa ka wala makilal-an nga suspitsado alas 6:30 sang gab-i, Nobyembre 29 sa Sta. Catalina Subd. Phase 3 Brgy. Lag-asan syudad sang Bago apang sang gin-usisa sang kapulisan, wala nagasinanto ang pahayag sang delivery boy.
Ini siya ang ginkilala sa kay Jomar Cortez, 41 anyos, sultero, residente sang Prk. Balunggay Brgy. Poblacion sang amo man nga syudad kag nagatrabaho bilang driver-delivery boy sa softdrinks dealer.
Sa inisyal nga alegasyon ni Cortez nga sang amo nga gab-i, samtang ini siya ang naga-ilis sang flat nga guma sang multicab nga ginakargahan sang softdrinks sa nahambitan nga lugar, siya ang ginpalapitan sang duwa ka wala makilal-an nga suspitsado kag kinuha ang iya bag sang isa sa mga suspitsado kag kinuha ang unod nga kwarta.
Sandig man sa alegasyon ni Cortez nga ini siya ang gintayaan kutsilyo sa liog rason nga siya ang napilas kag nakatigayon nga nakapalagyo kag iya ginbayaan ang multicab para makapangayo tabang sa mga residente.
Gilayon man nga ginapdulongan sang imbestigador ang lugar kag suno sa kay Lt. Joseph Jaro, deputy chief of police sang Bago PNP, wala naga-santo ang testimoniya ni Cortez sa aktuwal nga sitwasyon sa lugar.
Ini bangud, paano niya islan ang guma sang multicab kay wala man siya sang dala nga spare-tire kag ginpahayag man sang malapit nga vulcanizing shop nga wala man didto nakapabulkit si Cortez, kontra sa pahayag sini nga didto siya nagpabulkit.
Dugang pa ni Jaro nga may mga pamalay man sa palibot malapit sa diin ginbiln ni Cortez ang multicab kag wala sang may nakanotar nga may komusyon nga natabo.
Wala man sang may nakita nga iban nga persona ang mga residente maliban sa kay Cortez kag nadugayan pa ini magpangayo sang tabang kag pati bisan singgit wala man sila may nabatian.
Makatilingala man siling ni Jaro bangud wala gin-ubos kuwa ang kwarta kag ginbinlan pa 4,000 pesos nga yara man sa sulod sang bag.
Bangud nagaliwat-liwat ang testimoniya ni Cortez kag wala nagasanto ang iya ginapahayag sa kapulisan, nagaguwa nga iya lang ginhimo-himo ang scenario pati na ang iya pagkapilas para matabunan ang iya ginhimo.
Kombinsido ang kapulisan nga si Cortez mismo nagkuwa sang kwarta nga iya koleksiyon kag siya ang ginakabig na sa karon nga suspitsado sa krimen kag natalana nga pasakaan sang kaso.
Nasugilanon man sang imbestigador ang tag-iya sang ginaubrahan ni Cortez kag sa ila inventory, naglab-ot sa 7,000 pesos ang nadula kag desidido man sila magpasaka kaso.
Ginpahayag man ni Jaro nga si Cortez ang isa ka drug surrenderee apang wala sini gintapos ang iya rehabilitation.
