Gipanawagan sa Davao City Police Office (DCPO) ngadto sa publiko kung kinsa man ang dunay impormasyon kalabotan sa nahitabong hit and run sa may Cabantian ning dakbayan sa Davao diin biktima ang usa ka model ug singer.
Nangayo og tabang si DCPO Spokesperson Pol.Cap Hazel Tuazon sa mga duol nga establishemento nga kung basin dunay CCTV nga nakuha atol sa maong insedente.
Kini aron nga matabangan ug kahatagan og hustisya ang biktima labi na sa nahibiling pamilya.
Kahinumdoman nga niadtong alas-2:45 Dominggo sa kadlawon mihunong ang gisakyan nga motorsiklo ni Mark Ken Suarez Mariscal, 28-anyos, empleyado sa Salford College Australia ug taga Blk. 8 Lot 97 Deca Homes, Brgy. Indangan aron nga mangihi, apan kalit na lamang nga nawad-an og balanse ang biktima hinungdan nga natumba ug mao say pag agi sa SUV ug naligsan kini.
Gitabang dayon sa mga sakop sa Central 911 ang biktima ug gidala sa ospital apan gideklarang patay sa attending Physician.
Samtang, gikumpirma ni Pol.Cap Tuazon nga gikan sa gig ang biktima ug posibleng gikapoy kini gikan sa event hinungdan nga nawad-an kini og balanse sa dihang nihunong ang motor.
Nanawagan sab ang DCPO sa suspek nga unta makonsensiya kini ug musurender sa kapulisan.
Kasamtangan, nagpadayon pa ang gihimong imbestigasyon sa Buhangin Police Station kalabotan sa maong insedente.
