BICOL – LIWAT na tinawan duon kan Commission on Elections o COMELEC-Bicol na dai kaipuhan an covid-19 vaccination card para makaboto sa maabot na eleksyon.
Segun ki Calixto Aquino, Comelec-Bicol Director III asin Sorsogon Provincial Election Supervisor, mayo pang ley na nag-oobligar sa mga tawo na magpabakuna laban sa COVID-19 kun kaya dai man pwedeng isabay an vaccination card bilang mandatory requirement para sa mga botante sa May 9 elections.
Piglalaoman man kan komisyon na dakul pang mga botante an mayo pang bakuna pag abot kan election day kun kayat dai an mga ini oobligaron na makapag presentar nin vaccination card.
Ipinunto pa kaini na an “right to suffrage” o direchong makaboto an nasa irarom kan konstitusyon asin igwang proseso tanganing an sarong indibidwal an maging kwalipikado.
Kun engkaso man soboot na igwang idudugang na requirements, kaipuhan na ini an nakapalaman sa 1987 constitution.
Halimbawa soboot an pag-require sa mga political aspirants na mag sumiter nin drug test results para makapag file nin COC na kiniradan kan Supreme Court nin huli ta ini an soboot “unconstitutional.”
Magigiromdoman na ipinahayag kan executive director kan Legal Network for Truthful Elections (LENTE) na magiging kwestyunable kun engkaso ipipirit ini kan COMELEC bilang requirement.
Iring man sa aldaw kan eleksyon, piglalaoman na required pa man giraray an gabos na mga botanteng magsulot nin facemask siring man faceshields para sa mga lugar na nasa halangkaw na covid-19 risk classification.
