Gin-athag sang Capiz Electric Cooperative nga wala ini sang kontrol sa pagtaas kag pagnubo sa presyo sang kuryente, matapos nakabaton sang pila ka mga reklamo gikan sa mga konsumidor angut sa ila mataas nga electric bill sang nagligad nga bulan.
Suno kay Acting General Manager Edgar Diaz, pila sa mga rason sang mataas nga bill amo ang mataas nga pass on charges bangud nagabakal lamang ang kompanya sang supply kag gina-distribute sa mga kabalayan.
Dugang pa, bangud sa mataas nga demand sang kuryente sa subong nga mainit nga panahon, nagataas sang generation load ilabi na sa tion sa peak hours humalin alas 6:00 sa gab-i tubtob alas 11:00 sa gab-i.
Ginapahayag man sini, nga nagadalagan lamang ang bill sang 28 dias sang natinalikdan nga bulan, kun ikumpara sa karon nga bill nga 30 dias. Panugyan naman sini sa mga konsumidor nga i-manage ang ila paggamit sang kuryente ilabi na sa peak hours nga mataas ang demand sa elektrisidad.| Frances Joy Preciosa