LEGAZPI CITY – Pigpresentar kan Camalig Tourism Office sa Commission on Audit (COA) an gabos na tourism road projects para sa Camalig Tourism Circuit.
An proyekto iyo an sa irarom nin Tourism Road Infrastructure Project kan Department of Public Works and Highways (DPWH) asin Department of Tourism (DOT) kun sain sa presentasyon, tinawan-duon ni Municipal Tourism Officer Jed Villanueva an manungod sa magayon na epekto kaini nganing maparekas an serbisyong panturismo asin mapalangkaw an posibilidad na makapagtao ki trabaho asin an mas mapakarhay an ekonomiya kan banwaan.
Sa ngunyan, an ikinondusir na presentasyon sa COA iyo an may obhetong masiguro na nagsusunod sa batas asin regulasyon an lokal na gobyerno asin makatabang na mamantenir na tama an mga pisusumiter na report manungod sa pondo.
