Naging madinaeag-on ro ginpatigayun kahapon nga Blood-letting Activity it Brigada News FM Kalibo nga “DUGO PARA SA KABRIGADA” sa Kalibo Pastrana Park Covered Court.
Madinaeag-on nga nakapag-donate it andang dugo ro kapin sa 67 naton nga mga KaBrigada nga naghalin pa sa pilang banwa iya sa probinsya it Aklan.
Natigayun man nga maka donate it dugo ro pilang staff it Brigada News FM Kalibo sa pagpanguna ni Station Manager Joemer A. Soriano.
Masadya nga nagbatun ro first 50 succesful blood donor it T-shirt halin sa Brigada News FM Kalibo bilang souvenir sa andang pag-donate it dugo.
Raya eon ro ikaywang dag-on nga naghiwat it blood-letting activity ro Brigada News FM Kalibo sa pakikipag-partner sa Philippine Red Cross-Aklan Chapter.
Sa interview man it Brigada News FM Kalibo sa pilang mga blood donor, malipayun sanda ag boluntaryo ro andang pag-donar para makabulig ag makasalbar it kabuhi it isigkatawo. / ANN DESLENE SALAZAR
