DILI mawala ang kahadlok ug kabalaka sa usa ka Ginang nga nagbantay sa ASF checkpoint sa NGCP Road, Barangay Mabuhay, GenSan human sa nahitabong pagpangharas kaniya ug sa duha niini ka kaubanan. Saysay ni Alyas Nanette ginabati niini ang kahadlok samtang naga-duty siya sa nahisgotang lugar ilabi na kung iyang mahinomdoman ang nahitabo nga sila ang gigapos ug gitionan og armas sa mga armadong lalaki nga nihunong sa checkpoint area kaniadtong kadlawon sa Disyembre 10.
Apektado matud pa ang nasangpit nga ginang sa nahitabo ilabi na nga gikuha og apil ang ilang mga cellphone asa nakabutang ang tanan niining kontak.
Tungod sa panghitabo naghangyo kini sa mga personahi sa City Veterinary Office nga tabangan sila aron dili na masubli ang pagpangharas.
Luyo niini nagpadayon sa pagtrabaho ang tulo ka biktima tungod wala matud pa silay laing panginabuhi ug gikinahanglan nila ang trabaho aron makasustinir sa pagkinahanglan sa ilang mga pamilya.
Kahibaloan dunay dugang upat ka pulis gikan sa City Headquarters ang gibutang sa nahisgotang lugar aron motabang sa pagbantay ug masiguro ang seguridad sa mga trabahante. I Enamie Mogpon
