Nagpapagaling na sa ospital ang isang 38-anyos na binata makaraang pagtatagain ito ng tiyuhin ng kanyang girlfriend sa Brgy Poblacion, Monreal, Masbate.
Kinilala ang biktima na si Romulo Balatucan Deinla, naninirahan sa nasabing barangay habang ang suspek ay nakilalang si Jerry Alcansare Librando, 51-anyos, may asawa at residente ng parehong barangay.
Sa ulat na natanggap ng Brigada News, dakong alas 4:00 ng umaga noong Martes, palabas na sana ng compound ang biktima nang biglang undayan ng taga ng suspek.
Nabatid na binisita ng biktima ang kanyang girlfriend na pamangkin ng suspek at nakatira din sa nasabing compound.
Inaresto pa rin ng rumespondeng mga pulis ang suspek, kahit na nagpaliwang ito na hindi niya nakilala ang biktima dahil madilim at buong akala niya ay isa itong magnanakaw.
Narekober sa suspek ang itak na may habang dalawang talampakan.
