Reymund Titong
KABANKALAN CITY, Negros Occidental — Ang water sources nga nagahatag sang tubig sa apat ka mga barangay sa banwa sang Cauayan ang sa karun apektado sang salt water intrusion bangud sa kadugayon sang mga pipelines kag water sources.
Sa interview sang Kabankalan-based media kay Cauayan Mayor John Rey Tabujara, madugay na nga problema ang pag-impon sang asin nga tubig sa mga fresh water sources sang water district sang banwa, lakip na ang mga waterpipes sini.
Ang apat ka mga barangay nga apektado sang salt water intrusion amo ang barangay Tiling, Poblacion, Man-uling, kag Isio.
Dugang pa ni Tabujara nga ang engineering office sang banwa, kaupod ang ila consultant ang nagapangita na sang iban pa nga posibli ubrahon sa ila gina-atubang nga problema.
Apisar madugay pa ang proseso, maga-loan ang banwa sang ginabulubanta P90 milyones pesos nga igasto sa water rehabilitation project.
Nahibaluan nga halos isa na ka dekada nga problema ang salt intrusion nga naga-apekto sa kapin 400 ka mga households sang water district nga locally-managed sang LGU.
Sa karun, ang rehabilitation plan ang yara pa sa source development stage.
Kun indi makasugod ang proyekto subong nga tuig, maga-umpisa ini antis ang 2025 local and midterm elections, suno sa alkalde.
Lima tanan ka mga water sources nga kinahanglan para mahatagan sang potable nga tubig ang mga panimalay nga may access sa water district sang banwa. –BNFM Kabankalan
