Banga, Aklan – Nagboesa it award ro Kabataan Kontra Droga at Terorismo (KKDAT) – Banga Cultural Dance Troupe, sa ginpatigayun nga KKDAT Sining Bayanihan Cultural Dance Troupe Provincial and Regional Competition 2022 ku July 19 ag 21.
Ro BAGANI, nga cultural dance troupe nga ginabilog it miyembro it KKDAT halin sa banwa it Banga hay nag intra sa KKDAT Sining Bayanihan Cultural Dance Troupe Provincial Competition ku, July 19, sa Aklan Training Center sa Kalibo, Aklan kung siin, nabuoe nanda ro 1st place award halin sa ap-at nga contestant halin sa nagkasari-sari nga banwa sa probinsya.
Bangud kara, napili sanda nga magrepresenta sa provincial KKDAT sa regional competition.
Ro nasambit nga regional competition hay ginhiwat ku Huwebes it agahun, July 21, sa Police Regional Office 6 sa Iloilo City kung siin ro BAGANI dancers hay uman nga nagpatigayun it andang performance sa tinutuyo nga makabuoe it sambilog pang award para sa probinsya.
Ro tropa hay gindeklara bilang 4th place winner halin sa waeo nga contenders nga naga representa sa nagkasari-sari nga probinsya halin sa Rehiyon 6. / ANN DESLENE SALAZAR
