Nag eapta eon sa ibang banwa sa probinsya it Iloilo ro makataeapon nga African Swine Fever (ASF).
Suno kay Mayor Dennis Superficial, ginkumpirma kara nga na-detect ro ASF sa mga baboy sa Barangay Balabag, Santa Barbara sa Iloilo.
Bago paman ro kumpirmasyon it kaso it ASF, waeong baboy eon ro namatay suno sa alkalde.
Ginhayag man ni Provincial Veterinarian Dr. Darel Tabuada nga ro ASF hay nakaapekto sa tatlong backyard farms sa lugar.
Ro Santa Barbara ro pang limang banwa sa probinsya it Iloilo nga nakalista it kaso it ASF.
Ro iba pang banwa nga may kaso it ASF hay ro Oton, San Miguel, Leganes, ag Alimodian. / ANN DESLENE SALAZAR
