-Reymund Titong
KABANAKALAN CITY, Negros Occidental — Sa 31.48 ektaryas nga kamaisan sang Sitio Aglahog, Barangay Mahalang, sa syudad sang Himamaylan, 28.99 ektaryas ukon 92% diri ang apektado.
Sa interview sang Brigada News FM-Kabankalan kay Caresa Caceres, agricultural technologist focal person sang Himamaylan, iya ginpahayag nga yara sa “severe” ukon grabe ang pag pang-ataki sang armyworm sa kamaisan sa lugar.
Dugang pa ni Caceres nga yara pa lang sa vegetative stage ang mga tanum ukon nagapatubo pa lang, rason nga sarang pa sini maka rekober sa pagpang-aki sang peste.
Sa severe nga kaso, nagpang-spray ang syudad sang tatlo ka nagkalalain nga kemikal agud nga matapna ang padayon nga pag ut-ut sang mga ulod sa dahon sang mga mais. Samtang, biopesticide naman sa mga lugar nga indi severe ang pag-ataki sang peste.
Sa piyak nga bahin, suno naman kay Cesar Gayem, consultant sang city agriculture office, normal ang pagtuhaw sang mga armyworms bangud sang pagbaylo sang kondisyon sang tyempo – halin sa malawig nga tig-ilinit pakadto sa gulpi nga pag-ulan.
Sa inisyal nga datus sang ahensya, ang Barangay Talaban, Barangay 3, kag Carabalan, ang may narekord nga infestation sang armyworms nga may kabug-san nga 38.78 ektaryas nga pananum sang mais, sa diin 32.11 ektaryas diri ang apektado, lakip na ang Mahalang nga lubos nga na-apektuhan.*
