LEGAZPI CITY – Pigpapadagos ngunyan kan Albay Public Safety and Emergency Management Office (APSEMO) an pagpipreparar para sa linog.
Sa intrevista kan Brigada News FM Legazpi kay APSEMO Chief Dr. Cedric Daep, pigsabi niya na an linog kaya dai nin anoman na warning bako arog kan pagputok kan bulkan o mga bagyo. Mas delikado su boot ini kun dai ki anoman na preparasyon orog na kun mangyari nin biglaan.
Segun kay Daep, ini an napag-orolayan kan nagkaigwa sinda nin meeting, kun sain pig-aalerto na an mga LGUs na may mga populasyon na harani o nasa coastal areas na delikado en kaso magkaigwa nin tsunami.
Kaipuhan so boot na maaaraman an mga haralangkaw na lugar nganing en kaso mangyari ini na banggi, kaya nindang makaduman sa halangkaw na lugar kasabay an saindang pamilya nganing makasalbar.
Nasa labi trenta-mil katawo kaya an exposed sa tsunami na peligroso kun daing evacuation en kaso magkaigwa ki linog.
Kaya, sa ngunyan, ipinagpapadagos ninda an pagkakaigwa nin orolay dapit sa mga posibleng ikondosir na may kinaaman sa preparasyon sa linog siring kan drills asin simulation exercises.
