SORSOGON CITY – Hindi na nakapalag pa ang apat na lola matapos na maaresto sa sugal na entre cuatro kaninang alas 4:30 ng hapon sa bayan ng Gubat, Sorsogon.
Kinilala ang mga ito na sina Estela Ercas Espadero, 67-anyos, residente ng Brgy Buenavista; Nelia Guardian Lim, 67-anyos, may asawa, residente ng Brgy Panganiban; Perla Estiller Endraca, 68-anyos, biyuda, residente ng Brgy Ariman at Marilyn Esperida Espaldon, 67-anyos, may asawa at naninirahan sa Brgy Pinontingan, lahat ng nabatid na bayan.
Sa ulat, naisuplong umano ng isang concerned citizen sa mga awtoridad ang nasabing pasugalan kung saan ang operator ay si Espadero.
Sa ikinasang raid ay nakumpiska dito ang isang set ng baraha at perang taya.
Nahaharap na ang mga suspek sa kasong may kinalaman sa ilegal na sugal.
