BISAN dili na makaistorya pa, apan makita sa mga mata ug lihok sa lawas ang pagpasalamat ni Tatay Ramon Gumba, 67-anyos nga na-stroke ug nagalingkod na lang sa ilang balay.
Ang asawa niini nga si Nanay Marlita ang maoy nanginabuhi pinaagi sa paghagbas og mga sagbot sa ilang gibantayan nga lote ug manglabada usab.
Lisod matud pa ang ilang sitwasyon karon tungod wala nay kaabag sulod na sa upat ka tuig.
Ang bana nga na-stroke mag-unom ka tuig na ug upat ka tuig nga dili na makalakaw nga mag-inusara hinungdan nangayo og tabang bisan wheelchair aron mga makagawas sa ilang balay.
Ang panawagan ni Nanay Marlita ang gitubag ug mismo si Brigada Elmer V. Catulpos ang mihatod sa wheelchair sa ilang panimalay sa Prk. 4 New Mabuhay. Ang nahisgutang wheelchair ang gikan sa “singko, singko” nga donasyon sa mga miyembro sa KaBrigadahan Gensan nga gibansagan nga bayani ni Catulpos tungod sa ilang walay puas nga pagtabang sa ilang isigkatawo.
