Patong-patong nga kaso ang gipasaka sa kapulisan batok sa usa ka 42 anyos nga amahan human niini gikulata ang misis ug gitigbas ang kamot sa duha ka anak didto sa Barangay Bankerohan Sur, Montevista, Davao de Oro Sabado sa gabie.
Sa pakighinabi sa Brigada News Fm-Davao kang Police Corporal Rogelio Golo, Jr., imbestigador sa Montevista Police Station, nga naghupot sa maong kaso, gipasaka na ang kasong frustrated parricide, serious physical injuries, RA 7610 kun Child Abuse, Violence Against Women & Children (VAWC) sa Prosecutors Office kagahapon.
Dugang saysay sa imbistigador, gibutyag niini nga lango sa ilimnong makahubog ang amahan nga giilang si Alyas Rommie nga niuli sa ilang panimalay dala ang kasuko tungod sa selos.
Gipangita dayon niini ang asawa nga si Alyas Mira aron komprontahon sa pagtuo nga duna kini laing lalaki apan nagdumili nga makig-storya ug nisulod sa ilang lawak nga gikasuko pag-ayo sa suspek.
Didto na matud pa nagsugod ang panaglalis nga nisangko sa pagpangulata dayon mikuha og sundang ang bana og gitigbas hinungdan nga midagan ang asawa padulong sa ilang silingan.
Gipugngan pa sa tulo ka anak ang ilang amahan apan sila ang napahimungtan og natigbasan ang mga kamot sa duha ka bata ug taod-taod pa ang natigayong negosasyon tali sa suspek ug sa mga otoridad ayha hingpit nga nikuyog sa tabang sa iyang bayaw.
Ang mga bata ang anaa karon nagpuyo sa ilang apohan nga anaa ra sa luwas nga kahimtang samtang ang asawa ang padayon karong giatiman sa usa ka ospital sa Montevista tungod sa naangkon nga mga samad ug bun-og sa iyang nawong tungod sa pagpangulata.BNFM-DAVAO
