-Reymund Titong
KABANKALAN CITY, Negros Occidental — Sa mga naga-kalatabo sa Negros Occidental Electric Cooperative (NOCECO) nga gina-alegar pag-manipula sang National Electrification Administration (NEA), sa alegasyon nga agud hapos ang pag ma-take over sa kooperatiba kag magbutang sang mga tawo nga mag monopolya sa probinsya, mga lideres sang simbahan ang nagapamatok sa sini nga mga tikang.
Pahayag ni Reverend Father Melvin Fajardo sang Iglesia Filipina Independiente (IFI) sa banwa sang Ilog, dapat mag-isa kag mag tindog ang tanan sa pagbato batuk sa inhustisya nga gaka-agum sang mga kunsomidores sang NOCECO kag indi dapat mag pabungol-bungol kag pag pabulag-bulag.
“Kun ang tingog sang mga pumuluyo maghili-usa, wala sang diktador nga makadaog sa ila,” suno kay Fajardo. Kag para sa iya, ang pinakadelikado nga butang sa subong nga tion sa kalibutan amo ang pagiging ignorante kag arrogante.
Naga-upod man ang bug-os nga IFI sa banwa sang Ilog, sa panawagan sang linibo nga mga kunsomidores sang NOCECO gikan sa Central padulong sa sur nga bahin sang Negros Occidental, nga kakason si Antonio Mariano Almeda, bilang administrador sang National Electrification Administration (NEA), nga gin-appoint Naman sang 2022 ni Philippine President Ferdinand Marcos, Jr.*
