Ginakampanya makara it Department of Health (DOH) ro “early case management” kuntra sa sakit nga dengue sa Western Visayas.
Base sa panaysayon ni Dr. Bea Camille Natalaray, spokesperson it DOH Region 6, importante ro aga nga konsultasyon sa doktor para matukoy kung dengue o COVID-19 ro kaso agud makahimo it tama nga procedure sa kaso.
Nasayuran nga may pareho nga sintomas ro COVID-19 ag dengue.
Sa makara, nag-preposition eun ro DOH it masobra 16,000 dengue NS1 kits para ma-screen ro mga pasyente kung gintamaan sanda it dengue.
Maliban sa Dengue NS1 kits, nagpanupod man ro regional health department it IV fluids ag vector-control commodities kakapreho it larvicide, insecticide for misting, kulambo bilang augmentation.
Halin Enero 1 hasta Hulyo 9, ro Region 6 hay nakarekord it kabieogan nga 5,837 kaso it dengue nga may 34 nga mga namatay.
Mas mataas raya it 423% kumpara sa 1,116 nga kaso sa parehong timepo ku nagtaliwan nga dag-on./JIL B. LACSON
