Dakop sa ginpatigayun nga hot pursuit operation it Nabas PNP ro suspek sa pagpanakaw sa sangka gasolinahan sa Brgy. Alimbo Baybay, Nabas, Aklan ku nagtaliwan nga Hunyo 23, 2022.
Ginkilaea ro suspek nga si RUEL TAUNAN y AMORES, 21 anyos, single ag residente it Brgy. Yapak, Malay, Aklan.
Matandaan nga nagreport sa Nabas PNP ro tag-ana it gasolinahan nga si Evalyn Gonzales y Guevarra, single, 33 anyos ag residente it Brgy. Nagustan, Nabas, Aklan.
Sa report kara, sinueod it sangka manakaw ro anang gasolinahan pinaagi it pagsamad it glass door ag nadiskubre nga naduea ro kwarta nga nagabalor it P32,720.
Sa pag-check sa CCTV it nasambit nga gasolinahan, nakita sa camera ro tattoo sa leog it suspek nga may pangaeang “RUEL”.
Bangud kara, insigida nga nakilaea ag nakit-an ro suspek ag nadakpan sa area it Brgy. Andagao, Kalibo, Aklan.
Nasayuran nga ro suspek hay maabu eon nga kaso it pagpanakaw nga gin-kaimbolbahan halin pa kat raya hay sangka menor de edad pa eamang.
Ginkasuhan eon ro suspek it robbery ag may piyansang P18,000 para sa anang temporaryong kahilwayan.
Sa makarun hay nagapabilin raya nga sa kustodiya it Nabas Police Station. / ANN DESLENE SALAZAR
