Inatasan na ng Department of the Interior and Local Government (DILG) ang mga tauhan ng Philippine National Police na hanapin o tukuyin ang mga e-sabong sites na patuloy na nag-ooperate.
Ipinag-utos ni Interior Secretary Eduardo Año sa PNP Anti-Cybercrime Group at sa lahat ng PNP units sa buong bansa na tugisin ang mga nasa likod ng ‘unregulated online cockfighting sites’.
Batay kasi sa report, nasa pitong online cockfighting outfits pa rin ang natukoy na nagpapatuloy sa operasyon kahit pa matagal nang ipinag-utos ni Pangulong Rodrigo Duterte na bawal na ang e-sabong.
Ayon kay Interior Spokesperson at Undersecretary Jonathan Malaya, ang mga natukoy na mga e-sabong sites ay pawang mga walang lisensya o franchise mula sa kanilang local government unit.
Kaugnay nito, hinimok ng DILG ang publiko na kaagad isumbong sa mga kapulisan kung mayroon mang mga e-sabong sites sa kanilang mga lugar ang patuloy pa rin sa operasyon.(CLAY MARQUEZ)
#
