Nakapagtala na ang poll watchdog na Parish Pastoral Council for Responsible Voting (PPCRV) ng 100 percent match rate sa pagitan ng physical election returns (ERs) at electronically transmitted results sa 16,820 encoded ERs.
Ayon kay PPCRV spokesperson Atty. Van dela Cruz, ang ERs ay manual na inencode at beneripika ng daan-daang mga volunteers sa pamamagitan ng pagtutugma nito mula sa electronic results mula sa transparency server ng Commission on Elections.
Ipinaliwanag pa nito na ang mga encoded ERs ay “pre-transmission election returns” na tumutukoy sa returns na inimprinta ng vote counting machines (VCMs) bago ito itrinasmit ang resulta, electronically sa Comelec transparency server.
Mula Miyerkules ng gabi, nasa 23,420 physical ERs (o 21.73 percent ng mahigit 107,000 total returns) ang natanggap na ng PPCRV.
Ngayong araw, inaasahan mas maraming physical ERs ang darating.
