KORONADAL CITY — SUMUKO ang 14 na mga miyembro ng Bangsamoro Islamic Freedom Fighters o BIFF sa Criminal Investigation and Detection Group o CIDG sa probinsya ng Sultan Kudarat.
Ayon kay Maj. Gen. Albert Ignatius Ferro, CIDG national director, bitbit ng mga sumukong rebelde ang ibat-ibang matataas na baril na kinabibilangan ng anim na 7.62-caliber Barrett sniper rifles, dalawang M1 Garand rifles, isang .50-caliber Barret sniper rifle, isang M16 rifle, isang M79 Grenade launcher, isang Ultimax rifle, tatlong improvised rocket-propelled grenade launchers, dalawang mug bombs, isang improvised 60mm mortar pad,at mga bala.
Dagdag pa ni Ferro, na pawang mga miyembro ng BIFF – Kagui Karialan faction ang mga sumuko na nagsasagawa ng operasyon sa probinsya ng Sultan Kudarat at Maguindanao sa ilalim ng pamumuno ni Kumander Gani Saligan.
Nakatanggap naman ng livelihood packages ang mga sumukong rebelde mula sa Local Government Unit ng Lambayong.
